ثوره يم أهل الضمير انعوفــــــــــها          والنتايج بالنهايه انشــــــــوفــــــــها

* * *

وين أهل الفكر واربـــــاب النــــهى          هالسؤال من الصمــــــــيم انوجــــهه

حسين خالد يظل لو امره انتــــــهى          خل تجاوبنه ابنزاهــــــة جوفــــــــها

* * *

من تجاوب لا تـــــــراوغ باللــــــفظ          بالشرع كل انتــــهازي ينرفــــــــض

والقمم تبگه قمم مـــــا تنخــــــفض          هالأوصاف اتــــــــنزهه لموصوفــها

* * *

ثورة حسين اظهرت هاي الشـروح          التتصل بيها تشاهدها بوضـــــــــوح

ظهر نص الثوره من دم الجــــروح          وعا الضمير الحي تخط احـــــروفها

* * *

رزم ظعـــن التضحية وعرَّج حسين          الناس ما تدري مسير الظعــــن وين

منها گالــــــــت طالعه لنصرة الدين          ومنها گالت هاشم أبدت خـــــــــوفها

* * *

چان مغــــــــزه حسين بالثوره بعيد          شاف احرار البشر صاروا عـــــــبيد

وامة التنــــــــصاع للطاغي يــــزيد          ايصير منكرها مثل معـــــروفــــــــها

* * *

والهتافات الذي اتصـــــحي الفــــكر          من المدينة لساحة الطف تستــــــمر

منه هتف لا اشر طالـــــع لا بطــــر          رايد ايصحيها مـــــــن اطيوفــــــــها

* * *

واللي ما يصلحها اسلوب الرشــــاد          ترتضي ابحكم المظالم والفـــــــــساد

خل تشوف احسين بالتضحية اشراد          من توجه بالظعـــــــن لطفوفــــــــها

* * *

حسين من وجه رحاله للمســــــــير          سمع هاتف قدره يعـــــــلن بالمصير

ساروا الگوم ومنايــــاهم تســــــير          بساحة الطف تنتظرهــــــــــا حتوفها

* * *

لابن آدم حليه وانخــــط المــــــــماة          خط الگلادة وعلى جــــــــيد الفـــتاة

من تگطع جسمه عســــــلان الفلاة          دمه يكشف لآل امـــــية زيوفــــــــها

* * *

الباري لمن خبره ابنص البــــــــيان          حسين من هاي الحرب نال الضمان

عرف راسه ينرفع فوگ الســــــنان          وجثته دموم الشهادة نـــزوفــــــــها

* * *

حسين ثار ويدري بالطف ينچـــــتل          ليش أخذ ويه الظعن حـــــتى الطفل؟

بالشهادة يريد طفـــــله ينشــــــــمل          چالمواهي الما تعوف اخشــــــــوفها

* * *

وليش وياه الفواطـــــم راحــــــــله؟          الباري شائت حكمته لهالعـــــــــليله

يشوفها بالسبي اتغــــــــادر كربـــله          حاله كلفه اتعــــــجزه لمكلوفــــــــها

* * *

الظعن يمشي ولاحت آفاق الأمـــــل          وهودج أم الخدر بالعــــــــفه ابتـــهل

والينابيع (الزرودي) من وصـــــــل          بهالمكان الخيل تــــــم ارشوفــــــــها

* * *

هذي آخر منطقه لرشف الجـــــــياد          حالف ابن القين بـــــيها بانفــــــــراد

بلغه حسين لزهير اعله الجـــــــهاد          وبيها تم الجانبين احلــــــــوفــــــــها

* * *

والزمل واصل مســـــيره لنيــــنوى          راي هالاحرار عالثــوره انطــــــــوه

وگمر هاشم ناشر ابچــــفه اللـــــوه          ورايته ابيمناه صــــــار اشغـــــوفها

* * *

والمحامل تمشي مــــــثل المملــــكه          العفه بيها اويه المجد متـــــــشاركه

تختلف عــــن حال بعد المعـــــــركه          وحتماً اتغير الدنيه اصــــــــروفــــها

* * *

ظعن ابو السجاد للطف مـــن وصل          گمر هاشم نصّب خـــــيام الأهــــــــل

خيام غالب اصبحت كعـــــبة أمـــــل          وبني غالب بالرمــــــــاح اتطوفـــها

* * *

بالفجر من بــــــدت ساعات الزحف          سبعه وثمانين ضد سبعين الــــــــف

ابراي واحد عـــــالحرب ما مختلف          تريد تزعم لآل امـــــــيه أنوفــــــــها

* * *

راد ابو السجــــــــاد تحريك العـقول          من هتف يا گـــــوم آنه ابن الرسول

چنها ما تسمع ابو اليمه اشيـــگول          بالرذيله الطــــــــمع چان ايدوفـــــها

* * *

وعگب تبليغ الحجج والاعـــــتراف          صار ما بين الجحافل اخـــــــــــتلاف

واعتدل ابن الرياحي حين شــــــاف          بهالقتال الشمس تهوى اخسوفــــها

* * *

ساحة الطف ما جت ابخيل ورجــال          لاهفه لخوض الحرايب والقــــــــتال

بدت گبل المعركه ابرمي النــــــــبال          وظهرت لسفك الدموم لهــــــــــوفها

* * *

دخلت المعركه باطــــماع ودجــــــل          امصممه ولاچن يراودها الفـــــــشل

جاهليه وما صفح عنها الجــــــــهل          ومثل وقعة بدر دگ ادفـــــوفــــــــها

* * *

انقارن ابتفكير من غير انحــــــــياز          يا هو فاشل بالتصدي ويا هـــــو فاز

موحله وتحتاج دقــــــة اجتــــــــياز          للتوجــــه للمعــــــــارك شوفــــــــها

* * *

انخوض احداث المعـــــــارك بالفكر          وبمراحلــــــــها المهمه نستـــــــــمر

نشوف تالي يا كتــــيبه تنتــــــــصر          ويا كتيبه فاشله بزحـــــــــوفــــــــها

* * *

من بدت بالحومه ساعـــات النضال          والكتايب ماجت ابخــــــوض الاهوال

هوت أنصار ابواليمهم اعله الرمال          والمنايه رحِّبت بضــــــــيوفــــــــــها

* * *

ظلت بهالحرب عــــــــترة فاطــــمه          بكربله اتجابه غـــــمار الملحــــــــمه

سجلت أدوارها ابفــــيض الدمــــــه          ودمعة حسين اعــــــله خده اذروفها

* * *

استشهدت هاشم وظل بس الحسين          يصيح ما من ناصر ولا من معـــــين

اگباله سبعين الف مغرور ولعـــــين          وشاهره اعليه المنايه سيوفـــــــــها

* * *

گلبه ظامي والسهام اعليه تصـــــب          وبالمهند روع اصفوف الحــــــــرب

لوه الجنحين وطواها اعله الگـــلب          سلكت دروب الهزيمه صفـــــــــوفها

* * *

وراس ابو السجاد من صابه الحجر          وصبوا اعليه النبل صب المــــــــطر

ابو اليمه ابأهب لگــــطع النـــــــحر          عگب الأقمار الدناها اكسوفـــــــــها

* * *

گبل ما ينگطع نحر ابن الرســــــول          عالمخيم شاف غارات الخــــــــــيول

أشد من جرح البواتر والنــــــصول          شاف زينب على التل اوگــــــــــوفها

* * *

(دمشق ـ1980م)